Биылғы жылы Семей өңірінің ауыл-шаруашылық құрылымдары 15 мың 750 гектар көлеміндегі егістік алқаптарына егін екті. Бұл былтырғы жылмен салыстырғанда 20 пайызға артық. Бұл туралы қалалық ауыл шаруашылығы бөлімі мамандары баспасөз мәжілісінде мәлімдеді.
Ауыл шаруашылығы бөлімінің өсімдік секторы меңгерушісі Тоқтарғажы Стамбековтің айтуынша, биылғы жылы ауылшаруашылық құрылымдары мен жеке тұлғалар тарапынан 3223 гектар жерге картоп, 1470 гектарға көкөніс дақылдары, 75 гектарға бақша дақылдары егілген.
– Біздің өңір мал шаруашылығымен айналысатын болғандықтан, мақсатымыз – малдың азықтық базасын дайындау. Биылғы жылы біраз жұмыстар атқарылды. 450 гектарға сүрлемдік жүгері, 500 гектарға бір жылдық, 1400 гектарға көп жылдық шөптер егілді. Осы науқанды өткізу үшін ауылшаруашылық құрылымдарына арзандатылған бағамен 325 тонна дизель отыны бөлінді. Бүгінгі күні сәуір, мамыр, маусым айларына бөлінген жанармай толықтай игерілді. Бағасы 179-180 теңгеден. Ғылыми мекемелер берген қорытынды бойынша, егістік жұмыстарын 20 сәуір – 15 маусым аралығында аяқтадық, – деді Тоқтарғазы Стамбеков.
Өңірдегі мал шаруашылығы жайлы сектор меңгерушісі Рысгүл Рахимбаева баяндады. Оның айтуынша, ағымдағы жылдың 5 айының қорытындысы бойынша, кейбір ауыл шаруашылығы мал басының және мал шаруашылығы өнімділігінің өсу қарқыны бірқалыпты сақталуда. 2019 жылғы 1 маусымнан өңірдегі барлық шаруашылық нысандарында 65 600 бас мүйізді ірі қара, 99300 бас қой-ешкі, 800 бас шошқа, 40 200 бас жылқы және 1 млн 226 300 құс тіркелген. Ағымдағы жылдың 5 айында 10 мың 700 тонна ет, 10 мың 400 тонна сүт, 960 мың дана жұмыртқа, 140 тонна жүн өндірілген. Былтырғы жылдың осы кезеңімен салыстырғанда ет өндіру 8 пайызға, жұмыртқа көлемі 0,6 пайызға көбейген.
Өңірдегі балық шаруашылығының дамуы жайлы бөлім басшысы Нұрлан Шақабаев айтып берді. Нұрлан Нұрғалиұлының айтуынша, Знаменка тас жолы бойындағы бірнеше көлді балық аулауға жалға беру үшін конкурс жарияланбақ.
– Біз конкурс өткіземіз. Жеңіске жеткен мекеме көлдерді дамыту стратегиясымен айналысады. Бұл коммерциялық су қоймасы болуы да мүмкін. Бәлкім, сол жерде спорттық балық аулау, демалу ұйымдастырылады. Егер су қоймасына шабақтар жіберсек, олардың өсуі үшін су қоймасын жабу керек болады. Біз бәрін ескеруге тырысамыз. Қазір, негізінен, балық шаруашылығы Озерки көлінде және Мұрат саяжайындағы «Нұр» шаруа қожалығында дамытылуда,- деп атап өтті ауыл шаруашылығы бөлімінің басшысы.
Сондай-ақ Нұрлан Нұрғалиұлы «Котлован» көлі маңы енді ұйымдастырылмаған демалыс орны болмайтынын айтты. Мұнда көл маңы тазаланып, үйлер тұрғызылған.
– Енді бұл көл жай келіп шомылып, тамақтанып қайтатын орын емес. Ақысын төлеп, суға шомылып, демалып қайтамыз десеңіздер, ешқандай шектеу жоқ. Дұрыс ұйымдастыру болмағандықтан, бұдан бұрын көл маңында қайғылы оқиға орын алған еді,- деді Н.Нұрғалиұлы.
Бөлім басшысының орынбасары Ержан Сүлейменнің айтуынша, сүт өнімдерін сатып алу мен өңдеу жұмыстары толық көлемде орындалуда.
– Облыс әкімінің тапсырмасымен біз тұрғындардан сүт сатып алудамыз. Жоспар бойынша, 720 тонна сүт сатып алуымыз керек, қазір 290 тоннаға қол жеткіздік. Бүгінгі күні 7 ауылдық округ арнайы келісімшарт бойынша қайта өңдеу мекемелерімен жұмыс істеуде. Бір жарым мың отбасы сүт өткізеді. Литрі 90-100 теңге аралығында. Шикізатты үш сүт өңдейтін мекеме қабылдайды, сондай-ақ 5 сүт-тауарлы ферма жұмыс істейді, – деді Ержан Сүлеймен.
Жадыра ТӨЛЕГЕНҚЫЗЫ, «Семей таңы»{jcomments off}
