23 сәуірден 3 мамырға дейін COVID-19 коронавирустық инфекциясы жиілеген аймақтарда — Өскемен, Семей қалаларында және Аягөз ауданында қатаң шектеу шаралары енгізіледі. ШҚО бас санитарлық дәрігерінің 23 сәуірден бастап күшіне енетін жарлығын түсіндіру мақсатында қала әкімінің орынбасары Айдар Садырбаев пен Семей қаласының бас санитарлық дәрігері Берік Тілебалдин онлайн-брифинг өткізді.
Мәселен, қалаларда бұқаралық спорттық іс-шараларды өткізуге, мәдени нысандардың, аймақаралық реттелмейтін тасымалдардың, қалалық және реттелмейтін туристік тасымалдардың, бильярд бөлмелерінің, ойын клубтарының, боулингтер, балалардың сауықтыру лагерлері, ойын-сауық орталықтарының, караоке және түнгі клубтардың қызметіне, жерлеуге арналған ас беруге, отбасылық іс-шараларды өткізуге тиым салынды.
Шығыс Қазақстан облысы әкімінің тапсырмасымен коронавирустық инфекцияның таралу қаупін барынша азайту мақсатында Нұр-Сұлтан мен Алматыдан ұшақпен және пойызбен келетін жолаушылардың дене температурасы өлшенеді.
Брифингте айтылғандай, қала мектептеріндегі оқушылар арасындағы аурушаңдық туралы статистика көңіл көншітпейді.
— Инфекцияның жоғарғы көрсеткіші 5-8 сынып оқушылары арасында байқалады. Аурудың 30%-ы 1-4 сынып және 18%-ы жоғарғы сынып оқушылары арасында таралған. Осыған байланысты ертеңнен бастап оқушылардың негізгі контингентін қашықтықтан оқыту форматына ауыстыру арқылы шектеу шаралары енгізіледі. Бұл бітіретін курстарын қоспағанда, колледж студенттеріне де қатысты, — деді қала әкімнің орынбасары Айдар Садырбаев.
Еске сала кетейік, бүгінде КВИ инфекциясы анықталған мектептерде қажетті санитарлық-дезинфекциялық шаралар қабылданып, мектептер карантинге жабылды, ал оқушылар қашықтан оқуға ауыстырылды.
Айтолқын САМАТОВА, «Семей таңы»