Семей қаласының әкімі Бақытжан Байахметов апта ішінде жұмыс тобымен бірге қала көшелерін аралап шығып, абаттандыру мен тазарту жұмыстары бойынша тиісті мамандарға тапсырмалар жүктеді.
Бүгінде қала тұрғындарының сүйікті демалыс орындарының біріне айналған «Абай жолы» аллеясында ағаштарды әктеп, жүгіру жолдары мен ойын алаңдарындағы шағын сәулет пішіндерінің бояуларын жаңарту қажет.
Әуезов даңғылы бойындағы аумақта ағаштарды әктеп, жиналған қоқысты шығару қажет. Кеңселері көше бойында орналасқан кәсіпкерлер іргелес аумақты тазартуы керек, бұл жұмысты ұйымдастыру кәсіпкерлік және сәулет бөлімдеріне тапсырылды. Ал бойындағы ескірген нысандар алып тасталуы қажет, немесе ретке келтірілгендері жөн.
Автокөлік көпірі бірнеше күн бұрын толығымен асфальтталып, ондағы жарықтандыру тіректері боялған. Енді жол жиектерін ретке келтіру керек.
Шәкәрім даңғылы бойындағы стелланың айналасындағы учаскеде кешкі уақытта демалушылар көп жиналады. Аталған аумақ пен көпір маңын тазалау, сондай-ақ жарықтандыруды жөндеу тапсырылды.
Жағалауда гүл отырғызуға дайындық жұмыстары жүргізілуде. Кейбір жерлерде плиталарды қалпына келтіру қажет.
Орталық саябақта суару құбырын іске қосуға дайындық жұмыстары жүргізілуде. Сорғыларды орнатып, суару аймақтарын нақты бөлу керек.
Сондай-ақ саябақта жарықтандыруды реттеу жұмыстары аяқталуға жақын. Электр сымдары ретке келтіріліп, ескірген кабельдер ауыстырылды. Енді бірнеше күнде шамдар жеткізіліп, жарық орнатылады.
Қала әкімі саябақ аумағын жапырақтар мен басқа да қоқыстардан тазартуды тапсырды. Саябақта жоспарланған барлық жұмыстар апта сайын бақыланатын болады.
Ерлан АЙҚЫНҰЛЫ,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
