Сен құрметте оны!
АЙМАҚ БАСШЫСЫ СОҒЫС АРДАГЕРЛЕРІН ҚҰТТЫҚТАДЫ
Шығыс Қазақстанда Жеңістің 77 жылдығына арналған мерекелік іс-шаралар жоғары деңгейде ұйымдастырылды. Әсіресе соғыс ардагерлері мен тыл еңбеккерлеріне ерекше құрмет көрсетілді. Екінші дүниежүзілік соғысқа қатысқан ардагерлер мен тыл еңбеккерлеріне бір жарым миллион теңге тарту етілді. Жеңіс мейрамы қарсаңында ШҚО əкімі Даниал Ахметов Өскемен, Семей және Риддер қалаларындағы ардагерлердің шаңырақтарында болып, мерекелерімен құттықтады.
Риддер қаласындағы ардагер Павел Прокофьевич Альбоха ұшақтардағы байланыс радиожабдығы механигі болған. «Жауынгерлік еңбегі үшін» және «Германияны жеңгені үшін» медальдарын иеленген.
Құрмат Рақымовты облыс орталығының тұрғындары жақсы біледі. Ардагер 1942 жылғы 2 мамырдан бастап жауынгерлік іс-қимылдарға қатысып, бүкіл майданнан өтті, Литва және Беларусь республикаларын жаудан азат етуге қатысты.
Ал Терентьевка ауылының тумасы Степан Мишин 17 жасында майданға аттанып, жеңіске дейін неміс — Литва бандаларын жоюға қатысты. ІІ дәрежелі Отан соғысы орденімен марапатталған. Зейнеткерлікке шыққанға дейін зауытта штамптаушы болып жұмыс істеді.
Аймақ басшысы жақында жүз жасқа толған тыл еңбеккері Анна Лабкованы да құттықтады. Анна Лабкова «ҰОС жылдарындағы ерен еңбегі үшін» медалімен марапатталған.
Облыс басшысы құттықтап барған тағы бір тыл еңбеккері — Масара Нұрғазина, ақын, ұзақ жылдар бойы білім саласында еңбек еткен.
Семейде Даниал Кенжетайұлы ең алдымен Рашида Хасанованың шаңырағына барды. Рашида Ашрафовна – тыл еңбеккері, 1932 жылы 14 наурызда дүниеге келген.
«1941 – 1945 жылдардағы Ұлы Отан соғысындағы ерен еңбегі үшін» медалімен марапатталған. Бейбіт уақытта педагог болып жұмыс істеді. 1973 – 1988 жылдары, құрмет демалысына шыққанға дейін, мұғалімдердің біліктілігін арттыру институтын басқарды. Қазір құрметті демалыста болғанымен, белсенді қоғамдық жұмыс жүргізуді жалғастыруда. Семей қалалық ардагерлер кеңесі президиумының мүшесі. «Құрмет белгісі» орденін, «Ерен еңбегі үшін» медалін иеленген. Сондай-ақ «Қазақ КСР Халық ағарту ісінің үздігі», «КСРО Халық ағарту ісінің үздігі» атақтары бар.
Облыс әкімі құттықтап барған келесі ардагер — Асқар Рахымбаев 96 жаста. 1941 жылы Ақсуат аудандық әскери комиссариаты арқылы әскерге шақыртылған. Шығыс майданда атқыштар полкінің құрамында соғысқан. Румынияны, Брашев пен Мишельді азат ету шайқастарына қатысты. Жауынгерлік ерлігі үшін медальдармен және ордендермен марапатталған. Майдангердің бүгінде 10 баласы, 29 немересі және 44 шөбересі бар.
Ал 97 жастағы ардагер Матвей Юрченко әскери жолын 18 жасында жауынгер ретінде бастаған. 1945 жылға дейін ол 2-ші Украина майданы, 229-атқыштар полкі құрамында ұрыстарға қатысты. Ардагер «Ерлігі үшін» және «Германияны жеңгені үшін» медальдарымен марапатталған.
Облыс басшысы Даниал Ахметов соғыс ардагерлері мен тыл еңбеккерлеріне бір жарым миллион теңгенің сертификатын, тұрмыстық техника және азық-түлік себетін тапсырды.
— Майдан даласында соғысып, тылда жұмыс істегендердің бәрінің ерлігі ерен, ерлік ешқашан ұмытылмайды. Біздің ардагерлеріміздің батылдығы, табандылығы, еңбекқорлығы мен патриотизмі — қазіргі жастарға үлгі. Бізге бейбіт аспан сыйлаған аға буынды құрметтеу — міндетіміз!- деп атап өтті облыс әкімі Даниал Ахметов.
Айта кетейік, Президент Қасым-Жомарт Тоқаевтың тапсырмасымен ШҚО-да 42 соғыс ардагеріне 1,5 млн теңгеден табысталды. 10 754 ардагер, оларға теңестірілген азаматтар және еңбек ардагерлеріне арналған төлемдердің жалпы сомасы 630 500 мың теңгені құрайды. Сондай-ақ марапатталған тыл еңбеккерлеріне, ҰОС қатысушылары мен мүгедектерінің жесірлеріне, концлагерьлердің бұрынғы кәмелетке толмаған тұтқындарына, блокада кезінде жұмыс істеген адамдарға және Кеңес Армиясының ерікті жалдама құрамына 100 мың теңгеден төленді. Сонымен қатар тыл еңбеккерлері 50 мың теңгеден алды.
Анар АХМЕТҚАЛИЕВА,
«Семей таңы»
