«АБАЙҒА АПАРАР ЖОЛ» ШЫҒАРМАШЫЛЫҚ КЕШІ ӨТТІ
Абайдың «Жидебай-Бөрілі» мемлекеттік музей-қорығында ақын, ҚР Мәдениет қайраткері, Халықаралық «Алаш» әдеби сыйлығының лауреаты Әділғазы Қайырбековтың «Абайға апарар жол» тақырыбындағы шығармашылық кеші өтті.
Елуге тарта кітаптың авторы ретінде танылған шығармашылық иесі өзінің өмір жолының үзіндісімен бөлісіп, кеш атауына тоқталды.
- Еңбек жолымды оқу бітіре салысымен 1978 жылы жаңадан ашылып жатқан Сәбит Мұқанов музейінде экскурсовод болып бастадым. Бір жылдан кейін Қазақ телевизиясының «Құрдастар-Жастар» редакциясына редактор болып ауыстым. Содан бастап БАҚ саласында 22 жыл, атап айтсам, «Лениншіл жас» (қазіргі «Жас Алаш»), «Халық кеңесі», «Қазақ елі», «Шалқар» газеттерінде қызмет атқардым. Қазақ телевизиясы, газет редакциясындағы жылдар мен үшін үлкен мектеп. Одан кейін мұражай саласында қызмет істегеніме биыл тура 22 жыл. 2000 жылы Алматыдағы С.Мұқанов пен Ғ.Мүсіреповтің музей-кешеніне басшы болып келдім. Мұқановтың 100 жылдығы, бір жылдан кейін Мүсіреповтің 100 жылдығы ЮНЕСКО көлемінде өте жоғары деңгейде аталып өтілді. Сол жылдары өзім жасаған экспозицияны 20 жылдан кейін Ғ.Мүсіреповтің 120 жылдығына орай қайта өзгертіп, жаңартып жатырмын, бүгінгі күн талабына сай музей қалыптасуда. Шығармашылық кеш туралы айтатын болсам, биыл мектеп бітіргенімізге 50 жыл толып отыр. Туып-өскен ауылымыз Ақсуат ауданындағы совхоз осыдан он жылдай уақыт бұрын суға кетіп қалды. Ауылдағы үйлер, мектебіміз, мәдени үйіміз, кітапханамыз жоқ болды. 3 шақырым жерден жаңа ауыл салынса да, біз үшін ол бөтен ауыл. Сондықтан кездесуді Семейде өткізіп, шығармашылық кешпен толықтыруды жөн көрдік. Кездесу барысында Абай жолымен жүріп, Жидебайда Абай мен Шәкәрімнің басына тәу етіп, үлкен сапарға шықсақ деген ойымыз бар. Кеш атауын «Абайға апарар жол» деп атауымыз да содан, — дейді Ә. Қайырбеков.
Әдебиеттанушы-философ, Абай музейінің директоры Тұрдықұл Шаңбай ақын жайлы жылы естеліктермен бөлісіп, шығармашылық иесі туралы ақжарма лебізін білдірді. Сондай-ақ, Абай музейі мен Ә.Қайырбеков басқаратын С.Мұқанов және Ғ.Мүсірепов музейі арасындағы шығармашылық байланысқа тоқталды.
Шығармашылық кешінде ақын жерлестер алдында өзінің кейінгі жылдары қаламынан туған оқиғалы өлеңдері мен болмысы бөлек балладаларын паш етіп, жазуда шеберлігі шыңдалып, жаңа өріс тапқан және туындыларының көтерген жүгі турасында әңгіме өрбітті. Ә.Қайырбеков өз кезегінде Абай музейінің қорына өзінің он томдық шығармалар жинағы мен «Назқоңыр», «Ғ.Мүсіреповтың хатханасы» кітаптарын табыстады. Әдеби-сазды кешке жиналған ақынның замандастары, Семей қаласының зиялы қауым өкілдері мен өлеңге жаны құмар жас жеткіншектер шара соңында ақын қолтаңбасы қойылған кітабын сыйға алып тарқасты.
