ЕРЛІК ЕШҚАШАН ҰМЫТЫЛМАЙДЫ
Сәрсенбі, 8 ақпан күні Семейдегі бизнес және сервис колледжінде басқа мемлекеттердің аумағындағы ұрыс қимылдарының ардагерлеріне арналған салтанатты жиын өтті. Семей қаласы әкімдігі, ардагерлер ұйымы, «Шығыс» өңірлік қолбасшылығының басшылығымен бірлесе ұйымдастырылған шараға қала әкімі Нұрбол Нұрсағатов, Ауғанстандағы және басқа мемлекеттердегі жауынгерлік ұрыстарға қатысқан Қарулы Күштердің ардагерлері, студенттер мен оқушылар қатысты.
Дана ТАЛҒАТБЕК
«Семей таңы»
Салтанатты шара өзге елдегі ұрыс кезінде құрбан болған жерлестеріміздің, мәңгі жас болып жадымызда сақталып қалған сарбаздар мен сардарлардың рухына және бүгінде ортамызда жүрген ардагерлердің құрметіне ұйымдастырылды. Жиналғандар ерлікпен қаза тапқан жауынгерлер рухына тағзым етіп, бір минут үнсіздікпен еске алды.
Ардагерлер құрметіне ұйымдастырылған шараны шаһар басшысы алғы сөзбен ашты.
— Ардақты ағайын, құрметті жерлестер! 1992 жылдың маусымынан 2001 жылдың ақпанына дейін 10 мыңға жуық қазақстандық сарбаздар мен офицерлер өзге елге, ұрыс алаңына аттанды. Мыңдаған жас азамат жат елде жан тапсырып, екі мыңнан астам қандасымыз туған жеріне жарақатпен оралды. Оқ пен оттың ортасынан аман-есен оралғандар үшін «соғыс» ұғымы мәңгілік жан жарасына айналды. Бүгінде Семей өңірінде өзге мемлекет аумағында ұрыс алаңында жалынды жастығын сарп етіп, ерлік көрсеткен 150 ардагеріміз бар. Олардың қоғамға сіңірген еңбегі, елі мен жеріне деген сүйіспеншіліктері жастарымыздың бойында патриоттық сезімдерін арттыруға үлкен ықпал етуде. Соғыс ошағында қаза тапқан батырлардың ерліктері әрқашан жерлестерінің жүрегінде, тәуелсіз Қазақстанның тарихында мәңгі сақталып қалмақ, — деп атап өтті Нұрбол Төлегенұлы.
Келесі сөз кезегі «Шығыс» өңірлік қолбасшылығы әскерлері қолбасшысының орынбасары, полковник Асқар Акишевке берілді.
— Құрметті ардагерлер, қонақтар! ХХ ғасырда әлем елдерінде көптеген үлкенді-кішілі ұрыстар болды. Олардың қатарында тәжік-ауған шекарасындағы әскери қақтығыстар бар. Әскери борышын өтеу кезінде өмірінің соңына дейін Отан алдындағы парызын адал орындап, еліміздің қауіпсіздігін қамтамасыз еткен 17 әскери қызметкер ерлігі мен қаһармандығы үшін «Айбын» орденімен және «Жауынгерлік ерлігі үшін» медалімен марапатталды. Бүгінгі күні ортамызда жүрген соғыс ардагерлері өскелең ұрпақты патриоттыққа тәрбиелеу ісіне белсене атсалысуда. Басқа мемлекеттердiң аумағындағы ұрыс қимылдарына қатысқан ардагерлердің ерлігі біздің жүрегімізде қалады,- деді.
Тәжік-ауған қақтығысы ардагерлері қоғамының төрағасы Есенгелді Оразбаев 1992-2001 жылдары тәжік-ауған шекарасында ұрыс қимылдарына қатысқан ардагерлер ерліктің шынайы үлгісін көрсеткенін атап өтіп, қоғамдық бірлестік атынан қала әкімдігіне, ардагерлер ұйымына, «Шығыс» өңірлік әскери қолбасшылығы мен колледж ұжымына алғысын білдірді.
Жиын соңында қала әкімі Н.Нұрсағатов пен «Шығыс» өңірлік қолбасшылығы басшылығы басқа мемлекеттердің аумағындағы ұрыстарда ерлік көрсеткен және жас ұрпақты тәрбиелеу ісіне үлес қосып жүрген ардагерлерге марапаттар тапсырды.
