Semeytany.kz – Абай облысында суға түсу маусымы басталысымен-ақ, төтенше жағдайлардың алдын алу бағытындағы жұмыс күшейтілді. Құтқарушылар патрульдік рейдке шықты, ақпараттық баннерлер мен ескерту белгілері орнатылып, шомылуға тыйым салынған қауіпті жерлер анықталып жатыр. Бұл туралы өңірлік коммуникациялар қызметінде өткен баспасөз жиынында ТЖД өкілі мәлім етті.
Облыс аумағында 24 ресми шомылуға арналған орын белгіленген: 18-і коммуналдық, 2-еуі жекеменшік жағажай және 4 демалыс аймағында суға түсуге тыйым салынған. Сонымен қатар, суға шомылу қауіпті саналатын 66 орын мен шағын кемелерге тыйым салынған 2 учаске анықталған. Рейдтік шаралар барысында 200-ден астам жабдықталмаған және рұқсат етілмеген шомылу орны тіркеліп отыр.
Биылғы маусымда 16 су патрулі мен 32 жаяу патруль қызметке кіріскен. Барлығы 100-ден астам құтқарушы, 26 жүзу және көлік құралы жұмылдырылып, катерлер, гидроциклдер, эхолоттар, суасты бақылау құрылғылары, дрондар және дауыс зорайтқыштармен жабдықталған. Әсіресе балалар мен жасөспірімдер арасында түсіндіру жұмыстары мектептер мен колледждерде қарқынды жүргізілуде.
Қабылданған шараларға қарамастан, өткен жылы шомылу маусымында 17 адам суға кетіп, оның төртеуі – бала болған. Ал биылғы маусым басталғалы 6 адамның өмірі қиылды, олардың екеуі – бала. Сонымен бірге 31 адам құтқарылып, олардың 10-ы балалар.
Тұрғындар жиі баратын Шүлбі су қоймасында құтқарушылар күн сайын кезекшілік етеді. Жекеменшік жағажайларда қоғамдық құтқарушылар мен медицина бекеттері жұмыс істеп тұр. Қаланың өрт сөндіру бөлімдері де жаяу патрульге тартылады.
Құтқарушылар судағы қауіпсіздік ережелерін қатаң сақтау қажеттігін еске салады: тек рұқсат етілген орындарда шомылу, балаларды қараусыз қалдырмау, белгіленген шекарадан аспау, мас күйде суға түспеу және бейтаныс жерлерге сүңгімеу – басты талаптар.
Сондай-ақ, ресми жағажай иелері де қауіпсіздік талаптарына сай әрекет етуі тиіс: құтқару бекеттері мен алғашқы көмек пунктін ұйымдастыру, қалқыма белгілер мен дауыс зорайтқыштарды орнату, бақылау мұнаралары мен ақпараттық стендтер қою – адам өмірін сақтау жолындағы міндетті шарттар.
