СЕМЕЙДЕ СЕНБІЛІК БАСТАЛДЫ
Семейде екі ай бойы әр апта сайын сенбілік жұмыстары жүргізілетін болады. Бұл туралы Аймақтық коммуникациялар қызметінде өткен брифингте айтылды.
Қаланы қыс бойы жиналған қоқыстан тазартуға қала тұрғындары, мекемелер, кәсіпорындар, бизнес өкілдері қатысуы керек. Семей қалалық тұрғын үй-коммуналдық шаруашылығының басшысы Амантай Өтелбаевтың айтуынша, тазалық жұмыстары көп қабатты және жеке үйлердің аулаларында да жүргізілуі керек.
— Біз мекеме басшыларына қалада санитарлық тазалау мен көгалдандыру жұмыстары жүргізілетінін хабарлаймыз. Әр шағын және орта бизнес нысандары мен мекемелерге жеке жер телімдерін бекітеміз. Мұндай жұмыс пәтерлер мен жеке тұрғын үй иелерімен де жүргізілетін болады, — деді Амантай Өтелбаев.
Сенбілікте қала тұрғындарына барлық қажетті құрал-жабдықтар беріліп, арнайы техника да жұмылдырылмақ. Қаланың кіреберісімен қоса, зират маңдары да тазаланып, ретке келтіріледі. Қала ішінде дезинсекциялық өңдеу жоспарланып отыр. Ол үшін биыл үш миллион теңге қарастырылған көрінеді.
— Семейде жүзден астам бейберекет қоқыс үйінділері бар, олардың барлығын шығару керек. Бұл бағытта да жұмыстар жүргізіліп жатыр. Дезинсекциялық жұмыстар 20 сәуірден кейін басталады. Аталмыш жұмыстарды жағалауларда, су қоймаларының айналасында, Бейбітшілік аралында, 1-ші ықшам ауданда өткіземіз, — деді ТҮКШ бөлімінің басшысы.
Брифингте сонымен қатар Орталық саябақтағы жөндеу жұмыстары жайлы да сөз болды. Амантай Өтелбаевтың айтуынша, саябақты жөндеу жұмыстары бұрынғыдай ауқымды болмайды, жұмсалатын қаржы көлемі де көп емес. Биыл жасыл желекті суаруға арналған құбыр мәселесі шешімін таппақ, сонымен қатар электр желісін іске қосу жоспарланып отыр. Саябақта орнатылған архитектуралық элементтерді бояп, реттеу керек және тақтатастардың негізіне инертті материалдар төсеу қажет.
Айта кетерлігі, жөндеу жұмыстары кезінде саябақ ашық тұрады.
— Мамандармен бірге екі рет саябақта болдым. Демалыс күндері барып, жөндеу керек жерлерді қарадық. Бояу, жуу, кейбір элементтерді түзету сынды жұмыстар бар, косметикалық жөндеу жүргізу қажет. Сондай-ақ саябақта шұңқырлар бар, сондықтан біз тротуардағы тақтатастардың негізіне инертті материал төсейміз. Саябақта субұрқақ бар, ол жұмыс істеп тұр. 9 мамырдан кейін біз оны қосамыз, субұрқақ жазғы кезеңде жұмыс істейді.
Сонымен қатар силикат кірпіштен дәретхана салу да жоспарда бар. Саябақты күтіп ұстауға «Зеленстрой» ЖШС жауапты болады. Сондай-ақ «Sungig Service» ЖШС мердігер ретінде таңдалды. Бұл ретте өткен жылы жүргізілген сот тергеулеріне сәйкес саябақты абаттандырумен «Еңбек Семей» РМК — де айналысатын болады. Күрделі жөндеу жұмыстары жүргізілмейді. Жөндеу жұмыстары кезінде саябақты жаппаймыз, — деді брифингте қалалық тұрғын үй-коммуналдық шаруашылық бөлімінің басшысы Амантай Өтелбаев.
Саябақта сонымен қатар газон отырғызылып, қураған ағаштардан тазартылады.
Қалалық тұрғын үй-коммуналдық шаруашылығы бөлімінің басшысы Амантай Өтелбаевтың айтуынша, Семейде 5 мыңға жуық көшет отырғызу жоспарлануда. Алдағы уақытта қаланың дендрологиялық жоспары жасалмақ.
– Орындарды анықтаймыз, әзірлемелер бар. Барлығы қаржыландыруға байланысты. Дендрологиялық жоспар жасалады. Бүкіл қаланы қамту керек. Қаланы бөліктерге бөлеміз. Алдымен орталық бөлігін, сосын сол жағалау мен шеткі бөлігіне кірісеміз, – дейді Амантай Өтелбаев.
Өткен жылы оң жақ бұрылыстарды орнату кезінде кесілген ағаштардың орнына көшеттер отырғызылатын болады.
— Өткен жылы қалада көлік нөпірін азайту үшін оң бұрылыстар жасалды. Осы жұмыстар кезінде бірқатар ағаш кесілді. Биыл кесілген ағаштардың орнына ағаш отырғызатын жерлерді анықтаймыз. Яғни кесілген бір ағаш орнына он ағаш отырғызу керек болады. Сондай-ақ мүмкіндігінше, оң бұрылыстардың бойындағы аумақ абаттандырылатын болады. Жабайы өсетін шетен ағаштарын, ал үлкендеу аумақтарға пирамида тәрізді теректерді отырғызамыз. Мүмкіндігінше газон егеміз немесе тротуар төсейміз, — деді ТҮКШ бөлімінің басшысы Амантай Өтелбаев.
Сонымен қатар қала алаңдарында гүл егу жоспарлануда.
Өз тілшіміз
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
