Өткен апта соңында елордада ҚР Денсаулық сақтау министрлігі отандық медицина саласының бір топ үздіктерін марапаттады.
Премьер-Министрдің орынбасары Ералы Тоғжанов ҚР Президенті атынан «Дені сау ұлт» ұлттық медициналық саммитінің ашылуында еліміздің медицина қызметкерлерін кәсіби мерекелерімен құттықтап, олардың еліміздің әлеуметтік әл-ауқатына қосқан үлестерін атап өтті. Ералы Тоғжанов Мемлекет басшысының құттықтауын оқып, денсаулық сақтау саласының үздік қызметкерлеріне мемлекеттік наградалар тапсырды. Олардың қатарында Семей қаласындағы Жедел медициналық жәрдем ауруханасының бас дәрігері Ерлан Бүркітов те бар. Өз ісінің білгірі, аймағымыздағы медицинаның дамуына елеулі үлес қосып келе жатқан Ерлан Төлеуғазыұлы денсаулық сақтау саласындағы жетістіктері үшін «Ерен еңбегі үшін» мадалімен марапатталды.
— Сіздердің жұмыстарыңыз ерлікті талап етеді. Короновирустық пандемия кезіндегі еңбектеріңіз бұған дәлел болды. Сіздерге кәсібиліктеріңіз, табандылық пен жанқиярлықтарыңыз үшін алғыс айтқым келеді. Сіздерге табыстар мен биік жетістіктер, отбасыларыңызға денсаулық, бақыт және амандық тілеймін! Біздің ортақ міндетіміз — жұқпалы аурулардың пайда болуына, жалпы, аурулардың көбеюіне жол бермеу, барлық адамдарға көмектесу. Өз кезегімізде біз сіздердің еңбектеріңізді жеңілдету үшін барлық күш — жігерімізді саламыз, — деп атап өтті Е.Тоғжанов.
«ABAI AIMAQ MEDIA» ЖШС, «Семей таңы», «Вести Семей», «Біздің Бесқарағай» газеттері және «Semeytany.kz», «Vestisemey.kz», «Besqaragay.kz», «Abaieli24.kz» сайттары Ерлан Төлеуғазыұлын марапатымен құттықтап, еңбегіне табыс, мол жетістік, баянды бақыт тілейді.
«СТ» — ақпарат
