Көкпекті – облысымыздағы қарқынды дамып келе жатқан аудандардың бірі. Бұл орайда ауданды басқарып отырған тәжірибелі әкім Ділдәбек Оразбаевтың іскерлігін де ерекше атап өткен жөн. 21 ақпан күні Абай өңірлік коммуникациялар қызметінде өткен баспасөз конференциясында Ділдәбек Тәжібайұлы ауданның дамуын ілгерілету бағытында қолға алынып жатқан жұмыстар туралы айтып берді.
Егін шаруашылығында соңғы технологиялар қолданылуда
Аудан әкімінің айтуынша, 2022 жылы Көкпекті ауданында 86 901 гектар егістік жер игерілген. Оның ішінде 56 мың гектарға дәнді дақылдар, 31 гектарға майлы дақылдар егіліп, орта есеппен гектарына 10 — 11 центнерден өнім алынған.
— Былтыр жауын-шашынның аздығына және ауа райының қолайсыздығына байланысты, орта есеппен гектарына 10 центнерден өнім алдық. Биыл өнім көлемі жоғары болады деп жоспарлап отырмыз. Ауданда күнбағыс өсіру жақсы дамыған. 31 мың гектар жерге күнбағыс егілуде,- деді аудан әкімі Д.Оразбаев.
Ауданда егін шаруашылығы саласында соңғы технологиялар қолданылуда.
— Өзім осы саланың маманы болғаннан кейін жаңа технологияларды өндіріске енгізуге мән беремін. Әзірше ауданымызда егін шаруашылығы саласында нөлдік технологияны қолданып жатқандар саусақпен санарлық. Дегенмен өз нәтижесін беруде. Бұл технология шығындарды азайтып, өнімнің өзіндік құнын төмендетеді. Биыл тағы бірнеше шаруа қожалықтарына осы технологияны енгіземіз. Сонымен қатар жоғары сортты, элиталы, супер элиталы тұқымдарды егу бағытында жұмыстар жүргіземіз. Қазірдің өзінде супер элиталы тұқымдар сатып алынды, – деді Д.Оразбаев.
Аудан әкімі сондай-ақ интенсивті технологияны қолдану арқылы аз жерден көп өнім алуға көшуді қолға алатынын жеткізді.
Көкпекті ауданында 3000 гектар жерді жаңбырлатып суғару жоспарлануда. Биыл «Елім-ай» ЖШС-де 1000 гектар жер жаңбырлатып суғарылады.
— «Елім-ай» ЖШС-де 12 жаңбырлатып суғару техникасы іске қосылды. Қожалық тағы 10 жаңбырлатып суғару машиналарын орнатуды жоспарлауда. Сонымен қатар осы жылы «Өрнек» ЖШС-де 6 жаңбырлатып суғару машинасы қойылады. Жоспарымыз жүзеге асса, дақылдардан, шөптен мол өнім алынып, бағасы арзандайтын болады,- деді Д.Оразбаев.
Сонымен қатар осы жылдан бастап ауданда жайып суғару (лиманное орошение) әдісі қолданылмақ. Аудан бойынша бұл әдіспен 21 830 гектар жерді суару көзделіп отыр.
Айта кетейік, Көкпекті ауданында 2022 жылы ауыл шаруашылығының жалпы өнімінің көлемі 36 млрд 704 млн теңгені құрап, өткен жылдың сәйкес кезеңімен салыстырғанда өсу қарқыны 107,9 пайызды құрады. Оның 13 млрд теңгесі өсімдік шаруашылығына, 24 млрд теңгесі мал шаруашылығына тиесілі.
Екі сүт-тауарлы ферма мен сүт өңдейтін зауыт ашылады
Баспасөз мәжілісі барысында Ділдәбек Оразбаев сүт өндірісімен айналысатын «Өрнек» ЖШС-де 460 басқа арналған екі сүт-тауарлы ферма ашылатынын айтты.
— Өткен жылдың соңында облыс әкімі Н.Ұранхаев «Өрнек» ЖШС-де болып, жұмысымен танысты. Алдағы жылдары серіктестікте барлығы 920 басқа арналған екі сүт-тауарлы ферма жұмысын бастайды. Келесі жылы сүт өңдеу зауытын ашу бағытында жұмыс істеп жатырмыз. Осылайша, күніне 30 тонна сүт өңделіп, Семей қаласы мен өзге аудандарға сатуды жоспарлап отырмыз. Бұл жоспарлы шаралар 2023-2024 жылдары жүзеге асырылатын болады. Қазіргі уақытта жобалық-сметалық құжаттар мақұлданып, ауыл шаруашылығы басқармасымен келісілді,- деді аудан әкімі.
Сондай-ақ Көкпектіде балық, шұжық зауыттары ашылмақ.
— Ауданда балық шаруашылығын дамыту мақсатында Тассай ауылында 300 млн теңгеге балық зауыты салынуда. Зауыт биыл қыркүйек айына қарай іске қосылып, 50-60 адам жұмыспен қамтылады, — деді аудан әкімі Д. Оразбаев.
Сонымен қатар тай етінен шұжық жасайтын цех салынбақ.
Биыл сонымен қатар Көкпекті ауылындағы «Султман» шаруа қожалығында мал сою алаңын салу, тері өңдеу цехын ашу және Тассай ауылында мал сою алаңын салу жоспарлануда.
Айта кетейік, ауданда Симментал тұқымды сүтті бағыттағы және Герефорд — қазақтың ақбас тұқымды етті бағыттағы ірі қара малдары өсіріледі. Өткен жылы 8 мың тоннаға жуық ет, 51 мың тоннаға жуық сүт, 5800 дана жұмыртқа өндірілген.
Жағалау салынады
Биыл Көкпекті ауданында бес ауыл — Биғаш, Шұғылбай, Шәріптоғай, Мамай, Қараймойыл ауылдары орталықтандырылған ауыз сумен қамтылады. Бұл бағытта 2 млрд 200 млн теңге бөлінген. Келесі жылы тағы 4 ауылда су құбырлары тартылады.
— Ауылда халықтың тұрақтап қалуы үшін су, жол, мектеп, балабақша, емхана мәселелері шешілуі керек. Бүгінгі күні аталған ауылдарға таза ауыз су тарту бойынша барлық конкурстық рәсімдер аяқталып, мердігер компания анықталды. Көктемгі мезгілде жұмыстар басталады,- деді аудан әкімі.
Сонымен қатар Шәріптоғай, Мамай, Биғаш, Үлгілімалшы, Үшкөмей, Қарамойыл ауылдарында дәрігерлік амбулаториялар салу жоспарлануда.
Аудан әкімі Ділдәбек Оразбаев айтып өткендей, биыл Шәріптоғай, Толағай ауылдарына кіреберіс жолға, Көкжайы — Үлгілімалшы, Преображенка — Шұғылбай ауылдары арасындағы жолдарға асфальт төселіп, «Ауыл — Ел бесігі» бағдарламасы аясында Көкпекті ауылында ұзындығы 5 шақырым көше, Үлкенбөкен, Преображенка, Черноярка ауылдарының бір-бір көшелері орташа жөндеуден өтеді. Сондай-ақ Заречка — Көкпекті арасында көпір салынып, аудан орталығында тұрғындардың серуендеуіне арналған ұзындығы 1 шақырым болатын жағалау жасалады. Алдағы уақытта оның ұзындығын 3-4 шақырымға дейін жеткізу жоспарлануда.
Бүлдіршіндер балабақшамен қамтылады
Аудан әкімі Ділдәбек Оразбаевтың айтуынша, Мамай, Романовка, Преображенка, Биғаш ауылдарында 20-25 бүлдіршін, Көкпекті ауылында 40-тан астам бүлдіршін балабақша кезегін күтуде.
Аудан әкімі айтып өткендей, 1 наурызда Биғаш ауылында толық күнді балабақша, Көкжайық ауылындада «Бөбек лүпілі» жеке меншік балабақшасында 21 баланы қамтитын толық күнді топ ашылады.
— Өткен жылдың соңында Ақой ауылында 25 орынға арналған балабақша ашылды. Жалпы, күзге дейін 170-180 баланы балабақшамен, шағын орталықтармен қамтимыз. Сонымен қатар Биғаш ауылындағы негізгі мектепті орта мектепке айналдыру бағытында жұмыстар атқарылуда. Қазірдің өзінде жоғары сыныптарға 80-ге жуық оқушы жиналды,- деді аудан әкімі.
Дарынды балаларға арналған мектеп пен лицей, музыка және өнер мектебі болады
Аудан орталығындағы Көкпекті орта мектебі дарынды балаларға арналған мектепке, Жақия Шайжүнісов атындағы мектеп лицейге айналады.
— Ауданға дарынды балаларға арналған мектеп, лицей қажет. Аталған мектептерде білім сапасы өте жақсы. Бұл мұғалімдердің біліктілігі мен жалақысын көтеруге, оқушылардың білім сапасын арттыруға оң ықпал ететіні сөзсіз, — деді аудан әкімі.
Сонымен қатар Көкпекті ауылында екі қабатты заманауи музыка және өнер мектебі салынады. Мұнда вокал сабақтары, музыкалық аспаптар, хореография, сурет үйірмелері жұмыс істейтін болады. Аудан әкімінің айтуынша, жобалық-сметалық құжаттар дайындауға қаржы бөлінген.
Биыл сондай-ақ Көкпекті ауылынан батысқа қарай 6 шақырым жерде «Балдәурен» жазғы демалыс лагерінің 60 орындық үш қабатты заманауи ғимараты бой көтермек. Қазіргі уақытта демеушілер есебінен жобалық-сметалық құжаттама әзірленуде. «Балерке» балабақшасы жанынан қосымша ғимарат салынады.
— Биыл Преображенка, Жансүгіров, Биғаш орта мектептерін және Әуезов атындағы орта мектепті, Абай атындағы мектеп-балабақша кешенін, Шәріптоғай негізгі мектебін жөндеуден өткізу, Преображенка орта мектебінде химия кабинетін, Жансүгіров атындағы орта мектепте биология кабинетін, Абай атындағы мектеп-балабақша кешенінде биология кабинетін ашу жоспарлануда. Алдағы уақытта ауданда техникалық мамандықтарға арналған колледж ашуды да қолға аламыз,- деді Д. Оразбаев.
Мәдениет пен спорт саласы
Биылғы жылы Көкпекті ауданында демеушілер есебінен «Толағай сұлтаны» халықаралық спорт-мәдени сайысы, «Толағай таланттары» атты халықаралық әншілер фестивалі өтеді.
— Осыған байланысты ҚХР, Моңғолия, Түркия, Ресейдегі қандастарымызбен елшіліктер арқылы байланысып отырмыз. Сонымен қатар биыл республикалық ақындар айтысы да ұйымдастырылмақ,- деді аудан әкімі Д.Оразбаев.
Аудандағы туризмді дамыту мақсатында өткен жылы Бөдес Ата мазарын демеушілер есебінен абаттандыру жұмыстары басталды. Биыл жалғасын табатын болады.
— Тассай ауылының азаматтары бұл іске білек сыбана кірісіп кетті. Бөдес Ата кесенесін ашқан соң оны еліміздің киелі орындар қатарына қосу да жоспарымызда бар,- деді аудан әкімі Д.Оразбаев.
Айта кетейік, бүгінгі күні ауданда 1 мәдениет үйі, 12 ауылдық клуб, 9 кітапхана жұмыс істеуде. Мемлекеттік — жекеменшік есебінен өткен жылы Шұғылбай ауылында 150 орындық, Шәріптоғай ауылында 100 орындық ауылдық клуб ашылып, Үлкенбөкен ауылында мәдениет үйі күрделі жөндеуден өтті, аудандық мәдениет үйі 15 млн теңгеге қажетті құрал-жабдықтармен жабдықталды. Сонымен қатар былтыр Ажа мен Теректі ауылдарында футбол алаңы салынып, Көкжайық ауылындағы спорт залына күрделі жөндеу жұмыстары жүргізілді. Биыл Көкпекті ауылында екі балалар футбол алаңы пайдалауға берілмек. Сонымен қатар наурыз айында ұлттық ойындарды насихаттайтын ұлттық спорт ойындары мектебі ашылады деп күтілуде.
